Tud

Chubri - Institu d'inventerr e d'astouraij du galo

« Du galo pour astourr »

© Chubri

« Liested ar yezhoù zo a bouez bras evit mab-den. Mirout e yezh zo un doare da zerc’hel soñj eus un aozadur sokial, digor war ar bed e-ser an natur. Un doare da zerc’hel hon sevenadur bev ha da respont d’an daeoù da zont. Dre ar yezh e c’heller talañ ouzh ar sistem ekonomikel bedel ha chom bev en ur adskoulmañ gant an darempredoù lec'hel ha diorren ar rouedadoù sokial tost d'an dud. »

Bertràn Ôbrée
rener Chubri

Vidéo

Kefridioù

E poull-neuial ar Gougleiz anvet Coglé’O, e oar an dud hiviziken e talv Lé qmodité dé foum kement ha privezioù ha Ravigotri korn ar yec’hed. Tost eo panellerezh divyezhek poull-neuial kumuniezhel Sant-Brizh-Gougleiz ouzh ar gallaoueg komzet er vro ha klotañ a ra ouzh ar vuhez a-vremañ. Ur c’henlabour zo bet etre kumuniezh-kumunioù ar Gougleiz ha Chubri evit staliañ ar panellerezh-mañ. Kas a ra ensavadur renabliñ ha nevesaat ar gallaoueg ul labour kizidikaat ar strollegezhioù lec’hel ouzh liested ar yezhoù hag ar sevenadurioù en ur sikour anezho da ebarzhañ gwelloc’h ar gallaoueg en o folitikerezh foran. « War dachenn an ijinouriezh yezhel an hini e labouromp, evit degas ostilhoù diazez a roio an tu d’an dud d’ober gant ar gallaoueg hiziv an deiz », a zispleg Bèrtran Ôbrée, rener an ensavadur Chubri.

Termenoù nevesaet Lenn da heul

Sevel un doare-skrivañ en ur zoujañ da variezon ar yezh, klask termenoù a glot ouzh kement raktres ha servij treiñ… oberiant-kenañ eo Chubri war dachenn an nevesaat ha diorren ar gallaoueg. War gresk ez a an niver a c’houlennoù-treiñ, a zispleg ar rener, pa vije a-berzh ensavadurioù ha kevredigezhioù lec’hel ha rannvroel, met ivez a-berzh ar mediaoù, produerien bed ar c’hleweled, pe c’hoazh embregerezhioù ar boued hag an douristelezh : « Tud a vicher int hag ezhomm o deus eus termenoù a-vremañ a vez savet ganeomp-ni en hon aozadur ». Menegomp ur c’heriaoueg enni tri c’hant termen a denn d’ar c’hevredigezhioù ha d’an ekonomiezh, savet diwar goulenn Rannvro Breizh hag a anzav ar gallaoueg evel ur yezh a Vreizh abaoe 2004. « Evit a sell ouzh an dezougen da skouer, e kinnigomp ar gêr Chârayement, un ger nevez savet diwar ar verb chârayë, a dalvez treuzdougen hag al lost-gêr ment, da lavarout eo an doare d’ober un dra bennak », a zispleg Bèrtran Ôbrée.

Goulennoù a bep seurt a-berzh an holl c'hallaouegerien Lenn da heul

Goulennoù a vez savet diganeomp ivez gant an deskarded pe an emzeskarded a glask binvioù-yezh ouzhpenn evit respont da goulennoù yezhadur a denn da implij an amzer tremenet kevrennek hag an amzer trement-strizh pe kudennoù simploc’h a denn d’an distagadur. « A-wechoù e c’houlenn gallaouegerien nevez troidigezhioù berr evit hetiñ deiz-ha-bloaz laouen da skouer », a zispleg ar rener. A-benn nebeut e vo lakaet enlinenn lec’hienn internet nevez Chubri, gant ur c'hoant kelenn en un doare pedagogel evit ma c’hello an holl ober gant ar fichennoù-yezh hag ar yezhadurioù diyezhek kinniget gant ar gevredigezh, pe c’hoazh gant geriadur anvioù-bihan hag anvioù-familh kumunioù ha kêriadennoù Breizh-Uhel.

Ul labour dastum pizh Lenn da heul

Al labour ledanaat hag advuhezekaat ar gallaoueg a vez kaset da benn gant Chubri zo diazezet war un anaoudegezh spis eus ar yezh : ul labour dastum kaset da benn dre zielfennañ ha ditouriñ enrolladurioù gallaouegerien, a-gevret gant ul labour geriadurouriezh hag anvadurezh pizh ha fichennoù testeniekaat, ouzhpenn 66 000 anezho e 2016. Drezo e c'heller gouzout pelec'h kavout ger-mañ-ger en teuliadoù.

An teulierezh bras ha spis lakaet e-plas gant Chubri a ro an tu da wellaat binvioù-yezh efedus evit ma vo implijet ar yezh lec’hel-se er vuhez foran hag a vez lakaet war wel ha difennet en un doare digemplezh hiziv an deiz.

C. B.

Istor

2000 : krouidigezh ar gevredigezh Chubri.

2007 : digoradur Chubri, institu d’invetérr e d’valantaij du galo.

 

Diazezerien : Marc Clérivet ha Bèrtran Ôbrée.

Prezidantez : Alinn Metayer.

Skipailh : daou zen o labourat leun-amzer.

Arc'hantaouet eo gant

Rannvro Breizh, kuzulioù-departamant Il-ha-Gwilen, Liger-Atlantel hag ar Mor-Bihan, Kêr Roazhon.

Skoazellañ ar raktresoù : ministrerezh ar Sevenadur hag ar C’hehentiñ (DRAC Breizh ha Broioù al Liger).