Le sine ét pôzë su la Chârte qhulturale bertone le 4 du mouéz d’otobr 1977 entr l’Etat, l’EPR/APR (Aletement publliqe rejiona, coment qe taet nomée la Rejion avant la vouétrie universale) e les cinc departements bertons. Giscard d’Estaing banit la chârte-la sour chapiteriao a Pllermè le 9 de feverier 1977, a reqenét yelle la « meniere d’étr qhulturale de la Bertègn » e engaije la Rejion a fére après sa politiqe qhulturale, en reponse és « jens e elézus de Bertègn qi dirent lous chouere d’ergardance pour lous filomie ».
Ensegnement du berton e de la qhulture bertone
A sour fin d’ « erqenétr la valantour e la dignetë » du berton e de la qhulture bertone, la Chârte perpôze de parchomer un ensegnement en françaez su les patrimouenes qhulturaos bertons den les nouviaos pergrames « den tous les ordrs d’ensegnement e den toute la Bertègn ». Den la Chârte, i n-n ét mencion des encerches en istouere a mener den les haotes-ecoles e des richesses du Payiz galo etout. Le pus grôs des avanjées, qe l’Etat a de payer, ét raport ao berton : ensegnement ao chouéz en 6e e 5e, levée d’un ensegnement ao chouéz (berton e qhulture bertone) en 4e e 3e a l’enretournée 1979 a la meniere des parlements vivants ; la sieute-la mene a l’ensegnement ao chouéz du berton ao bacheloriat qi tourne « valabl come deûzieme parlement » pour toutes les afilées. Nouviao e vrai conseqent, les oures de pâssées-la sont encôrporées den les oures du coleje e le service des ensegnous a se porter. La formézon és ensegnous-la a d’étr garantie o qheuqes estaijes menës par le ministére de l’Eblucerie nacionale.
Radio e teledevizouer
La Chârte se montere nôzouze su le sujit-la, yelle q’ét pâs-meins le « mayen qe la qhulture rejionale se demouceleje ». Le fezant reste tout come pouint grôs : eune donée de 20 minutes de temp pâsse semainiere ao teledevizouer, o la promésse d’un crû des pergrames a conter du bout de l’anée 1978 !
Patrimouene qhultura
La saqée pour le patrimouene ded’o la levée d’eune Ouvrouere tecniqe rejionale (consorterie d’aprés la louai de 1901) e la promésse de mettr a crétr l’aïde en arjent e tecniqe és « consorteries qhulturales bertones » (Kendalc’h perezempl) vizent etout a qe la qhulture bertone seje erqenûe.
Il ét mencion etout des chapelles bertones come des « ôtës de payiz », sans pouint oubelier les ôtës d’eblucerie a la sonerie, en-méle d’aotrs afétûres…
Consail qhultura de Bertègn
La Chârte perpôze qe seje levë un Consail qhultura de Bertègn o 61 souétiérs a reperzenter des aguerouées de terrouere, des viles e haotes-ecoles, des consorteries qhulturales (diz pllaces), le prefet de la Rejion e le Rectou d’Academie a prendr part és ouvraijes. N-i ara de bâillë châqe anée un aviz su coment qe sont evâillës les qerdits e ventiés qheuqes idées su « les grands sayons de la politiqe qhulturale de la Bertègn » aoprés d’eune Consultée enteredepartementale alivrée entr les Consails jeneraos e l’Etat (o les 5 prefets en-méle les 9 erperzentants).
Institut qhultura de Bertègn
L’Institut qhultura de Bertègn bani ergarde, ao parsu du berton e du galo, lous ecrivaijes « a la goule come a l’ecrit », e maintiuns demaines de l’art e du patrimouene. Raport és elijes, la part de l’Etat qi vaot aotant come la siene de l’EPR/APR sera yelle de 3 milions de francs l’anée.
Le coûtaije de rouellance sera ecalë par la maitië entr l’Etat (1,5 milions de francs) e les Consails jeneraos des cinc departements.
Ao fin-bout
Ao parsu d’eune Chârte q’amontere eune nouvelle « democracie françéze » q’ét de ghize, bllâzonée a gaoche (par l’UDB surtout), ça q’ét eune vrae avanjée a emboni les maintieunes fezantes agueriées par les menances gaolists par aprés Mai 68. En Bertègn, la Chârte rempllace de méme la louai Deixonne de l’entama des anées cincante qi taet la soule mayenerie minze ao roule du temp-la pour maintiuns parlements en France. La louai-la avaet yû të votée en conassent més ao pus bâs, par aprés des entr-devizées safrs, en sieute a des recllâmeries qi remontent és anées trente terjou.
Le Consail qhultura de Bertègn s’ét raféçonë pour tourner afétûre oficiale du Consail rejiona de Bertègn, qi a deprinz la Chârte, pour la pus grande part.
