Eune aparessance de separt
Le separt des parlements n'a pâs jameins të fllejë, les siançous, diq'ao mitan du XXe siecl, fute pâs-meins surprinz raport a son tracë qi taet ben nif. « Le monde caozent le berzonèqe ou ne le caoze pouint » ecrivit un vayaijou en 1828.
L'istouerou Pitre-Chevalier contit en 1845 de « la murâille de Chine du parlement berton ». Un siecl pus tard, le jeyografe Marcel Gautier sonjaet li terjou en 1947 qe n-i avaet pouint de pâssaije aoqhun [entr les parlements] : un russè, un chemin, qheuqes fais, n-i a ren q'ela come separt entr deûz fezance-valair, i n-n'a yeune eyou q'ét des bertonous qi restent tant qe den l'aotr, ao dret, le monde ne caozent ren qe le françaez ».
Carte d'Argentré - CRBC
La permiere erperzentézon cartografiqe du separt des parlements entr la Haote e la Basse-Bertègn fut banie den « L'histoire de Bretaigne » de Bertrand d'Argentré en 1588, meins le tracë ét core pâs ghere perciz.
Permiere encerche
Ét Charles Coquebert de Monbret qi menit la permiere encerche, oficiale ao parsu, su le sujit-la durant le Permier Empire. en 1806. Su la côte du haot, le separt taet a Plouha du temp-la. Les vilaijes de Bâ e la qemune de Penétin caozaent berton a bâs de la Vilaine, parai come Qhitembè den le haot. A Loudia e La Roche, le monde caozaent chinot, meins.
La réle Sébillot
Le tracë de qhi qe nen caoze terjou ét li ao Paul Sébillot en 1886. Sti-la n'âlit pouint vaer le monde pâs-meins, i s'aïdit putôt des ghimentements rasserës o eune dizaine de raportants. En séz paijes de texe e catr cartes, i depingllit les separts entr les deûz parlements, qemune a qemune e méme vilaije a vilaije.
« Partout den Plloua, ecrivaet sti-la, le monde caozent berton e le françaez ben des fais. Corlae ét en Bâsse-Bertègn parai come Mur eyou q'ét bétôt toute la qemune qi caoze berton. Gheltâ ét en payiz françaez tant qe Nouya-Pondi ét en payiz berton. Bilië ét la dâraine qemune bertonouze ao haot de la Vilaine. A bâs de la riviere-la, 'la caoze terjou berton den sete vilaijes de la më-ile de Batz. »
Deûz menieres de fére pâs parai
En 1925, le linghist Albert Dauzat taet en doute qe le separt entr les parlements taet fllejë e vint en Bertègn pour ghetter a n'en savair pus fôt. I chouézi li de conter putôt de l'avancerie du françaez. Il erqenaet pâs-meins qe « si qe nen lésse ao berton tertoute les qemunes eyou q'il ét core caozë, le separt de 1886 a pâs ghére boûjë ». I sonjaet pâs-meins qe le separt-la taet pour deveni a ren « bétôt » a Plloua parai come den la më-ile de Rhuys.
Ses articls enterbolite Roparz Hemon. En 1828, sti-la qi taet menou de la jeune gazette d'ecrivaijes Gwalarn partit a ghetter pour la permiere fai su coment qe le berton taet préchë den toutes les qemunes de Basse-Bertègn. A-vûe 1886, toutes les métrs-qemunes de canton pâs ben lein du separt 'la y'avaet chanjë le parlement pour mener la précherie a l'iglléze : Plloua, Lanvolon, Corlae, Mur. Les parouesses deûlangaijieres-la taent tournées ao françaez. Yelles eyou qe n-i a core des sermons en berton (Bignan, Saint-Jean-Bervelay...) 'la n'taent ren qe des qemunes de campaigne.
Eune encerche q'aqhite d'ezempl
Le tarvâil qi fut bani par R. Panier en 1942, ouvraije perciz e fèt de reng, erprinz qemune a qemune e vilaije a vilaije le tracë ao Sébillot. Le Panier-la alit qhessioner le monde long le separt entre les parlements. I ne marqit come « pouints les pus a soulaire du berton qe les enrets eyou qe deûz-traez rengs d'âje de monde ont le berton a lou chet den la goule de méme, de lou propr »
| En 1886 | En 1942 | |
|---|---|---|
| A l'about | 92 | 92 |
| Comben qe n-i a de vilaijes caoze-berton ? | 92 | |
| Comben qe n-i a de vilaijes core caoze-berton ? | 43 | |
| Comben qe n'i a de vilaijes eyou qe le monde caozent chinot admézë ? | 45 | |
| Vilaijes abolis | 4 |
I s'avizit de méme qe le monde venu ne qenessaent pus le berton a Plloua e qe n-i avaet ren qe qheuqes anciens a le caozer core. Tant qe den les vilaijes de Saint-Gildas (22) eyou qe 'la chinotaet admézë, 'la n'taet pouint le galo qe le monde caozaent meins un françaez du payiz. Ao Vieu-Bourg, « les garçâilles q'il ont eune qhette de berton e eune qhette de galo ne qenessent pouint le berton meins l'apernent a l'ecole o lous coteries ». A Mur, du temp-la, le monde ne caozent pus ghere berton a la vile e 'la braghigne en françaez ao marchië.
R. Panier dizaet li qe le berton avaet « erqhulë hardiment » depés 1886 den le bâs du Morbihan, és ebords d'iao pus fôt qe den le mitan du departement. A Nouya, le separt avaet erqhulë de sete qhilometrs a galerne, Bilië taet enchinotée net. Den la më-ile de Rhuys, les jieunes ne savaent pus le berton meins la plleuralitë du monde le caozaent tout come.
Ghetter aprés le separt
Den le dârain cart du XXe siecl, d'aotrs « ghettous de separt » s'interessite core ao separt entr les parlements. En 1976, l'Ameriqhaine Lenora A. Timm sieudit le pouchon és siançous d'avant e alit lever du néz e de l'oraille den châqe bourg e vilaije q'i taet contance den les encerches ao Sébillot. O vayit de méme de 40 qemunes a galerne du separt e qheuqes aotrs a soulaire.
A sa mode, i n-n'avaet ren q'un coupl – Kergrist e Nouya-Pondi – qi pouvaent terjou y’étr ergardë come des vilaijes caoze-berton. Vinte-uét pouvaent core l'étr « un p'tit ». E diz taent « enchinotës net », den la më-ile de Rhuys, meins etout a Vane e alentour.
Faot-ti core n'en conter anet ?
A la mode de Timm, « 'la ne sert pus de ren » de caozer core du separt-la. Thomas Buckley, qi alit vaer le monde devers Plloua, erqenaet li etout q'il ét bétôt aboli, meins n-i a pâs-meins core de li, méme pour les siens qi ne caozent pouint les parlements de Bertègn. A oui le Buckley-la, les veûs-la sont de mode de dire sans termayer : « Ilë ét le berton, la-lein a deûz qhulbutées, traez encalées, ét le patoué ».
Dede 'la, faot-ti terjou conter de la réle Sébillot ? Ole ét vieu-fète ben sûr, raport qe le separt entr les parlements avaet, li, tenant erqhulë a galerne avant 1886 e q'ela ne se bourdit pouint par aprés, pour tourner en mèlerie a la parfin. Son tracë ét li tout come core de rencontr a caoze q'il a a maitië chemin entr les encerches les pus vieu-fètes e les sienes les pus fré-fétes.
