Adeûzë souventes fai, le lin e le chanvr ont le méme charpentaije biolojiqe. Le lin Linum usitatissimum, la q'ét pour les pllantes a sicots e uilouzes, eune èrbouze a fllours blleuves. Més n-i a etout des variances a fllours bllanches, roujes ou ben core jaones. Le chanvr (Cannabis sativa) ét, tant q’a li, eune èrbouze etout e ét de la méme orine botaniqe qe le cannabis defutant. Les uzaijes qi se complletaent yun l’aotr qe nen fezaet des tailes téssues en pernant den les pllantes-la monterent ben comben qe la fezaet un biao harnae yun l'aotr : le lin pour les biaos abits e la naperie, les linceûs, le chanvr pour les cordaijes, la piaferie, le gâraod e les voueles de batiaos.
M'atent ben qe Jean Tanguy fut le permier istouerier a mettr d'apert dés aossitot les anées 60 qe les vejetaos-la taent conseqents pour l'economie bertone. Stu-ci menit des etudes su les grandes pâssées des manouvraijeries, du XVe ao XVIII e siecl. Dedepés, i n-n ût d'aotrs a sieudr sa pouche e d'aotrs istoueriérs e istouerous menite des encerches den ben d'aotr contrées qe le Payiz de Montroulez su qhi q'i tarvâillit
Traez couéfes a pésseler des piës fumelles de chanvrs e toçant des petites liacées su la brae. De méme i fezaent chaer les chenevés. Codaqe de Charles Géniaux. Muzë de Bertègn : 2013.0008.28.
En Bertègn, le cllimat oceyaniqe e les terres de qheur sont bones pour qhultiver les pllantes-la. Les aires limouzes de la côte d'ahaot sont poûssantes pour le lin tant q'ao chanvr, q'ét pâs lechou, esti-la poûsse partout âillou. Faot pouint ombier de dire qe les tailes téssues pour la mezonée, "l'amenerie privée" e yelles pour le qemerce e pour la hor-vente, c'ét deûz. La taile pour la hor-vente ét rélée par des rélées rouayales e les tailes-la ont hardi de noms : den le Finistere, la q'ét les "crées", qe lous variances sont les "rosconnes", "graciennes" ou "pedernecqs", "landerneaux" ou ben core "plougastel"...et Den les Côtes d'Ahaot, la q'ét les "bretagnes" Les tailes de chanvr ont, yelles, nom "olonnes" a l'entour de Lokorn e "noyales" a Nouya. Ét de l'amenerie de lin a sicots qe j'alons caozer dessour-ilë.
Lin berton e hor-ajetë : de la Baltiqe a Rosko
Des batelées de linettes sont hor-ajetées depés la Baltiqe e s'erivent ao port de Rosko. Les batiaos-la qi s'en vienent des ports de Libau, Windau, Riga, Memel ou ben core Königsberg depouchent lous batelées de cartaods de 80kg a la prime aprés traez maez su la mè. Dede la, les linettes sont evâillées den les aotrs ports du haot de la Bertègn, putôt par batiaos de côtaije. E les batelées-la, la q'ét pouint petit jeu, dame : en 1757, i n-n a zû 1 368 tonées de lin de dezembarqées de catorze batiaos.
Aloure qe la Bertègn qhultive du lin du temp-la, faot tout come n-n hor-ajeter, la q'a a-revaer o la bllaterie qe faot ennouviaozi reglèment. Qhulture de prime, la pllante-la se haite ben den les terres fonces, ben cherruées. Le lin ét pâs ghere lechou de grésse ou de medecines més i terit les terres. Il ét minz en permier de la tournerie des qhultures, tous les siz-sete ans. La fllourézon, la q'ét 100 jous pus tard. La petite fllour blleuve, yelle q'en vait le pus, ét d'egace. O decllôt ao matin e o chet a veprée. Més de la dessu, i n-n a eune aotr qi vient su la tije e la fllourézon dure de méme un diz de journées. Pari qe les miraobiaos de cllôz blleûs qi frizolent sour les ventées sont un espectacl des pus biaos ?
Eune ramarerie ben nijone a fere més ben sonjée
Pour avair les sicots les pus longs, ét metier d’araicher les pllantes a bra e, dede la n-i a hardi d'ouvraijes pour qhi qe n-i ara afere de hardi de manouveriérs e d'iao. Les ouvraijes-la, la q'ét souventes fais des payizans qi s’en chevissent. Ela lous done un petit d'elijes en pus qi s'epelent ben vûes. La rouairie, la permiere bezaigne a fere pour separti les lignes du bouéz, ét menée den les poullin - agovées pouint maçonées en Leon ou ben den les rotouérs -piece d'iao, douet- du Tregor. La fut defensë de le fere den l'iao a coure raport a l'ensouirie. Anet, nen fet la "su la prée" : les landains de lin sont delandainës su la prée e minz reglèment a l'arvés pour aïder a la rouzée a veni dessu. Dede la, les botes sont minzes ao hale avant qe d'étr teillées, a sour fin de separti les sicots du bouéz (anas) en le brayant pés en le groujant. Le reparon de lin ét aloure portë és filandieres qi filent su un devidouer (ou rouat) o eune grande reûe come i n-n'avaet a toutes les portes du temp-la. Le metier de filandieres, putôt un metier de couéfes, ne se vaye den les rôles d'impôz qe den la deûzieme maïtië du XVIIIe siecl. Pour c'qe n-i a des diferences d'uzaijes, du temp-la, entr la contrée des crées e yelle des bretagnes, c'ét deûz. En Leon, nen bllanchi les echiës de fi den les kanndi tant q'entour de Qhintin, la q'ét les tailes qi sont bllanchies.
Fere des tailes fètisses
Dede la, les tessiérs mettent la chaïgne su le tailier q’ét amarë den un enret ben cru a sour fin qe le fi ne s'ecourteraet pouint. La peut y'étr a demeure, céz le payizan-marchand ou ben den le bout du XVIIIe siecl, den des taillaijes. Cant qe c'ét qe s'erivit la navette volante la q'amendit un petit ste vrae penelle qe taet l'ouvraije-la. Longou, léze e calitë sont rélées o des rélées rouayales qi menent toute l'amenerie de tailes. Les cartayous de taile s'i raportent etout.
Les pouchées de lin sont ensieute chârayées diq'és buraos de merqes, q'ont të aletës den les pôrts hor-vendous de Landerne, Montroulez, Saint-Berieu, Saint-Mâlo, Naonte, Vane, An Oriant e menës par un comiz sour les yeûz és marchandous. Aprés li és tessiérs, li és pllayous de tailes, la q’ét le tapon ao burè de controle des tailes q’ét minz dessu avant qe d'étr abraqées den les batiaos o les marchanderies des moulins-tans.
Taile, Olonne de Lokorn, refezerie d'eune taile du XVIe siecl. Meniere de taile fétes den le payiz de Lokorn. Orinézon de Bruno Lesteven. Muzë de Bertègn : 2002.0048.2.
Tout le fricot qi fut gâgnë o la fezerie de tailes e son qemerce lessit qheuqes bâtisseries den le payizaije berton. Pâssë le patrimouene ancien, q'a a-revaer o le tarvâil des payizans, les fameûzes demeurances és payizans-marchands sont des ressouvenances de l'alivetë economiqe fllourissante-la. Den les pôrts, maintiunes bâtisseries qemandées par les marchandous-armatouérs sont aotant de merqes de la fllourézon-la. E pés, du temp-la, j'ons etout gardë les encllôz parouéssiaos qi n-n a bel e ben den la contrée des crées.
