Qe le cinema s'interesseraet den le feu ça q'ét pouint drole d'eune miette. Depés sen orine, st'enterprinze de defuterie done bel e ben de fimes "egâchée" a sour fin de teni la lésse du qheur és ergardous q’i pouraent se defumer la téte qheuqes dizaines de minutes durant. Meins, durant ste sairée du dimaine 12 du mouéz d'avri 1931, den la sale ben d'amain du cinema Omnia de la pllace du Carthage a Rene, pllace du Calvére asteure, la rialitë e l'enjinée c'ét parai.
Du temp-la, durant les fimes, n-i a core un arétâ a sour fin qe l'ouvraijou chanje les rouelles du pourjetouer. Durant de méme, les ergardous se n-n alent de la sale e, come nen conte le journa catoliqe renaez L'Ouest-Éclair qi raconte les arivements percizement, ise defutent dehô, su la pllace. Ao coup-la, i vayent des fllambes ao dehô d'un demeurion de contr. Parai come den le pus etragnant des fimes egâchée, la brûlerie ét terjou a s'evâiller. Un coupl d'oures de temp aprés l'entamâ de ste forteune de feu, le cinema ét pus ren q'eune méziere e la maçacr de coupole qe n-i avaet dessu la bâtissure chet den un moucè.
Meins le senario de st'afére-la, q'orineraet des fimeries d'Hollywood ben enhaitantes, seraet pouint brave sans pâs de forteunë vrai forteunë e prinzoniérs de fllambes. Come si qe ça q'avaet davantë La Tour d'enfè, fameûz fime banit en 1974, catr jeunes escoutes "qi taent a s'en reveni d'une muzée du dimaine" dejouqirent o eune fune eune fome e son poupon de catr mouéz d'âje, prinz den un milahaot qe le feu taet deden. Un petit de temps aprés, c'ét un coupl embâmë e eune veuviere qi sont saovës par touéz aotrs bones jens qi taent venus vaer qe n-i avaet pus pouint persone aoqheune den la bâtissure-la.
N-i a zû du combat pour tuer le brûlement-la, siz oures de temp tout come ! Si qe n-i a pouint zû grôs de monde atijës - ren q'un pompier un petit atijë -, n-i a zû grôs de cai hachë, meins. Den les gazettes c'ét ben ecri qe c'ét la pus pire brûlerie qe la vile a qenûe depés 1921 cant qe le palés Saint-Jorje fut abrâzë.
