N-i pâs ren qe la vile de Renes qi fut rouchée par le feu. De méme, l'istouere de Naonte ét marqée par les brûleries. En a souvenance, seben, du sien qe n-i ût le 18 du mouéz de juïllet 2020 den la catedrale, bâtissure qi fut déja brûlée en 1972 e retourée carante e yeune anées de temp durant. Le tort ét su qhi don ? "Un ouverier pouint avizë assë", qi "taet a ramarer des jointaijes su le tersete d'ahaot de la bâtissure e qi minz le feu deden o son chalumiao maogrë li". A-vûe comben qe ça y'a brûlë, le monde nen furent tout emayës e le banier de la telëdevizouere, qi contit de st'emayante afére, a pouint zû poûr de dire qe "en qheuqes minutes de temp, yere, des siecls d'istouere se n-n alirent a ren".
Le 24 du mouéz d'oût 1796, c'ét le fameûz teyâtr Graslin qi fut rouchë o le feu. Rebâti de chë-en-chë a conter de 1811 e eternë un coupl d'anées aprés, asteure c'ét yun des simboles de la Citë des Ducs. De méme, o le maçacr de brûlement du mouéz de delère 1117, le mur de l'hayée qi passaet paravant eyou qe n-i a la pllace du Pilori d'asteure ét reqhulë diq'a l'Erdr. Un coupl de siecls avant, les Vikings pillent la vile e mettent le feu deden. Ça taet qheuqes berouées d'eune pus longue istouere qi monterent comben qe la vile de Naonte, brulée de brûlements, s’erchome su ses cendrs e s’erbâtit châqe fai.
