E miz Meurzh 2013 e oa bet aozet, gant Penngevredigezh mirourien dastumadegoù publik ar Frañs (AGCCPF) asambles gant Ofis ar glad sevenadurel dizanvez (OPCI), un emgav e Trelaze (49), evit ma c’hallfe ar berzhidi rannañ o skiant-prenet war plas an hengoun dre gomz er mirdioù, en ekomirdioù hag e kement aozadur publik a seurt-se zo.

Bodet eo an holl brezegennoù bet kinniget en 268^vet niverenn ar gelaouenn vrav-se a vez o voueta ingal an dud a-vicher er mirdioù.

Un dek vloaz zo bennak bremañ eo birvidik da vat ar preder war gudennoù na vezent ket taolet alies e kont a-raok : daoust hag he deus ar sevenadur dre gomz ur plas en tier a lak ar sevenadur war-wel ? Respontoù a zo degaset d’ar goulenn-se, dre skiant-prenet pleustrek ha liesseurt ar brezegennerien, e Aktoù an emgav-se aozet gant an OPCI. Tri rann ac’h a d’ober anezhe : « Pa zeu ar gaoz d’an traoù », « Talvoudekaat seurtoù nevez ar glad », « Un doare mirdi nevez diwar binvioù niverel ».

Er prezegennoù e lenner tamm-ha-tamm an diskoulmoù kinniget e mirdioù zo : mirdi Istor an Embroañ e Pariz, mirdi enezenn Oleron, Kumuniezh kumunioù Marais-de-Monts evit Ekomirdi gwern ar Vande Le Daviaud, mirdi Skol vroadel an arzoù hag ar micherioù/CNAM e Pariz, mirdi ar c’hemberioù e Lyon, mirdi teknikoù ar feilhañs e Sarreguemines, mirdi Istor Naoned, mirdi Istor ar Vande, hag e servijoù-bro aozadurioù kumuniezhioù publik zo ivez : servij glad Rannvro Broioù al Liger, servij glad Kêr Konkerne, Kêr Blaen, Kêr Trelaze ; ha dre soñjoù enklaskerien engouestlet e talvoudekaat ar seurt glad-se : Catherine Cuenca, war anv ar gefredi PATSTEC e skol-veur Naoned, Yann Leborgne war anv an OPCI, Gérôme Guibert, deus ar Sorbonne, war anv ar CIM.

Kavet e vez an teuliad bras ha leun-se en AGCCPF, 6, bali Mahatma-Gandhi, 75116 Paris, pg. 01 44 17 60 60. Priz ur skouerenn : 25 €, frejoù kas e-barzh.

Unan deus an emgavioù aozet gant an OPCI eo an devezhioù Hengoun dre gomz ha mirdioù, evit ma c’hallfe an dud komz deus dastum, saveteiñ ha talvoudekaat ar glad sevenadurel dizanvez.

Emgavioù da zont :

Mémoires en chantier – Mémoires des ports, deus an 3 d’ar 5 a viz Here 2014 (Eñvorennoù er chantieroù, er porzhioù, kenaozet gant Kêr Konkerne).

Mémoires entrelacées : pevar devezh evit lidañ pempvet bloavezh an OPCI, e Naoned, etre an 22 hag ar 25 a viz Here 2014 (asambles gant Les Anneaux de la Mémoire ha Mémoires de l’Outre-Mer).

Evit kaout titouroù ha lakaat e anv : Michel Colleu – OPCI, 29, straed Yann-d’Argent, Douarnenez,  06 34 96 03 13 – contact@opci-asso.fr – www.opci-asso.fr

Kemerit perzh e renabl ar glad sevenadurel e Breizh. Titouroù war lec’hienn ar rannvro.

Un 3e galv da raktresoù zo embannet gant Rannvro Breizh evit kas war-raok raktresoù sevenadurel hag arzel hag a lakay tud etre 15 ha 29 bloaz e-kreiz ar jeu.

Pal an 3^e galv-se, embannet gant Rannvro Breizh e-barzh he folitikerezh evit ar sevenadur, eo sikour ar raktresoù sevenadurel hag arzel evit re yaouank etre 15 ha 29 bloaz, dreist-holl ar re en em gav ar pellañ eus ar rouedadoù sevenadurel hag arzel, ha da gentañ er c’hornadoù-bro ‘lec’h ma vez an dibaotañ ar servijoù sevenadurel.

Pedet eo an holl re a labour war dachenn ar sevenadur, ar stummañ pe an harp d’ar re yaouank da respont dezhañ en ur genlabourat ha lakaat ar re yaouank e-barzh an taol kement ha ma c’hellint : frammoù harpañ (obererien ar c’henemprañ, kefridiezhioù lec’hel…), aveadurioù sevenadurel, kevredigezhioù oberiant war dachenn ar sevenadur pe an deskadurezh pobl, embregerezhioù sevenadurel (embannerien, levrdiourien, produerien pladennoù pe filmoù…), kumunioù, liseoù (evit obererezhioù ha ne c’hellont ket bout arc’hantaouet gant ar stignad Karta, a skoazell raktresoù al liseoù) hag aozadurioù stummañ, skipailhoù arzel…

Evezhiadenn : ne c’hellor ket degemer an abadennoù hep liamm ebet ouzh un obererezh sevenadurel war hir dermen (fest, leurenn-lañs ha traoù seurt-se o-unan) ha da eil e tremeno ar raktresoù a zo ul lodenn eus obererezh boas ar frammoù, nemet e vefent un digarez da vont war tachennoù nevez, e lec’hioù nevez pe da skoulmiñ kevelerezhioù nevez-flamm. Spered an 3^e galv-se : kas war-raok ar c’hevelerezhioù etre obererien eus ar c’henemprañ hag obererien sevenadurel hag arzel, ober traoù war hir dermen, ergerzhet an holl ziskiblezhioù arz ha, dreist-holl, lakaat ar re yaouank e-kreiz ar jeu da vat !

Penaos respont d’ar galv da raktresoù ?
Sellit ouzh ar fichenn bleustrek evit gouzout penaos ober, pellgargit ha kasit ho teuliad emstrivañ a-raok an 12 a viz Mae 2014.

Titouroù : http://www.bretagne.fr/internet/jcms/prod_204859/projets-culturels-place-aux-jeunes-2014-2015

Kinnig a ra Vincent Paulic deomp ur sell all war idantelezh Breizh, dre santimantoù ar re e ra-eñ an Afrikarmorikaned dioute. Afrikan eo unan deus o zud, ha ne vez gwelet enne, alies-mat, gant an dud tro-dro dezhe, nemet o zu afrikan, kentoc’h evit o idantelezh a Vreizhiz, ha pa vefent ganet er vro, desket er sevenadur gall, a-wechoù memes e sevenadur Breizh penn-da-benn. E gwenn ha du int bet filmet gant Vincent Paulic, « livioù banniel Breizh », evit diskouez pezh a gompren-eñ deus ar gaou-gwir-se, deus temoù an idantelezh, ar vroadelezh, ha sell ar re all.

Kant bro, kant kliched

Da geñver meur a raktres en deus bet tro Vincent Paulic da labourat gant kalzig a dud. Un deiz bennak e oa bet unan bennak o c’houll gantañ abalamour da betra ne laboure gwech ebet gant Bretonezed, en ur ziskouez dezhañ, gant unan deus ar jestroù soutil-se, e oa an dalc’h gant liv o c’hroc’hen. Souezhet-bras e oa bet ar poltrejer, abalamour ma oa Nolwenn, ar plac’h e oa o labourat ganti, a orin deus Sant-Brieg. Ma ne oa ket Bretonez, petra ’oa-hi neuze ? Ha petra eo bezañ breton, a-benn ar fin ? Difluket e oa ennañ soñj kentañ ar raktres-mañ.

Evit mont pelloc’h ganti en deus bet goulennataet an holl hironed a oa tro-dro dezhañ, evit goût peseurt plas o doa, herveze, e kevredigezh Breizh, ha peseurt distok a oa etre pezh a soñjent-int deus o idantelezh ha sell ar re all.

E miz Gouere 2013 e oa krog gant e labour. Ha da veajiñ e pemp departamant Breizh, ur foñs gwenn, ur gambr poltriji hag ur sonenroller gantañ e-barzh e sac’h. Da heul ar c’homzoù bet dastumet gantañ en deus bet savet ur poltred deus ul lodenn deus yaouankiz Breizh, ha roiñ a ra deomp da rannañ e eñvorennoù hag e soñjoù war sevenadur Breizh ha selloù an dud.

Loreet eo bet a-unvouezh gant izili juri liseidi Ouest-France, asambles gant ar festival Photoreporter, ar raktres nevezer ha hardizh-se war yaouankizoù hag idantelezh Breizh.

Diframmañ ar c’hlichedoù a-rumm-da-rumm

Hirie e klask Vincent Paulic diskouez e labour e lec’hioù nevez, evit ma komzfe an dud deus idantelezh Breizh, diouzh un tu, met deus ar c’henstagañ ha deus sell ar re all ivez.

War ar memes tro e talc’h ar poltrejer gant e enklaskoù, ha n’eo ket gant ar re yaouank nemetken. Faotañ a ra dezhañ dastum testenioù tud ar rummadoù all ivez, evit klask kompren pezh en deus cheñchet en hanter-kant vloavezh tremenet pe pezh n’en deus ket cheñchet.

Sachet e vez an evezh da vat gant elevez ar poltrejer a zeu da lakaat stlabez er skeudennoù zo en hon fennoù, hep goût deomp, war ar Vretonezed hag ar Vretoned a-hirie.

Evit gwelet skeudennoù deus ar raktres-se, emgav war lec’hienn Vincent Paulic, http://vincentpaulic.fr.

Bizitiñ an diskouezadeg a c’hallit ober ivez, e ti-kêr Porzhig (Aodoù-an-Arvor) betek ar 15 a viz Meurzh 2014.

Lakaat e anv en 11^vet kenstrivadeg etreliseoù ar sonerezh hengounel a c’haller ober bremañ.

Lakaat e anv er genstrivadeg : [Pellgargañ ar furmskrid]

Berzh en doa graet ar genstrivadeg-mañ er bloavezhioù 1990, ha drezi hon doa gellet klevet sonerien donezonet e-giz Karma, Spontus, Menestra, Hamon-Martin, Sko Barzh…

D’ar 25 a viz Ebrel e vo dalc’het ar genstrivadeg e 2014, en añfiteatr al lise Felix an Danteg e Lannuon (22).

Gant an amzer zo bet er bloaz-mañ diouzh ar goañv, ne vo ket aezet mont a-enep d’ar c’hliched dalc’hus-se… ha chom a ra stag evel ar goap ’ba Bro-Gerne !

Neuze ’ta, gwir pe gaou ? Muioc’h a c’hlav a ra e Brest evit e Biarritz pe get ? Ha mojenn ar seizh amzer e-korf un devezh, kliched pe get ?

Sell aze tem pennañ pemvet rann ar rummad web « Klichedoù Breizh » kenbroduet gant BCD, LB Krouiñ ha Chadennoù skinwel lec’hel Breizh.

Emgav neuze war chadenn web klichedoù breizh war lec’hienn BCD.

Roiñ da welet ha da gompren Breizh hag he istor liesseurt, sell aze pal uhel Bretania, Porched nevez-flamm sevenadurioù Breizh (www.bretania.fr). E penn ar raktres emañ Rannvro Breizh, ha buhezet eo gant ar gevredigezh Bretagne Culture Diversité/Sevenadurioù. D’ar 14 a viz C’hwevrer, en Oriant, eo bet lañset ez-ofisiel gant Ronan Koadig, prezidant BCD, asambles gant Jean-Michel Le Boulanger, eil-prezidant ar Rannvro war ar sevenadur.

Ur gwir zor digor war holl zanvez sevenadur ha glad ar vro eo Bretania, a zo harpet hirie war ur rouedad dek perzhiad bennak (Kreizenn an Enklaskoù Breizhek ha Keltiek, Cartolis, Gwarez Filmoù Breizh, Dastum, Dépêche de Brest, INA Atlantel, servij renabloù ar C’huzul Rannvro, levraoueg niverel Skol-Veur Roazhon 2, levraoueg Rennes Métropole, KSDK). Kenlabourerien ar Porched int, ha bodet eo bet gante o dafar dre glewed pe dre weled, bet dastumet gante pell zo ha niverelaet c’hoazh, evit lakaat un 350 000 diell niverelaet bennak, ha pennadoù-skrid da heul, e kerz an holl dud.

Petra zo da welet ?

Deus enlivadurioù ar Grenn Amzer da bennadoù kazetennoù a-raok ar brezel, en ur gontañ ar c’hartennoù-post kentañ bet embannet e penn-kentañ an xx^vet kantved, e c’haller lâret eo divent danvez sevenadurel Breizh. Ur sell war an holl zielloù liesseurt ha niverus-se zo roet war Bretania, ha kinniget int e meur a stumm : soniadoù, videoioù, skeudennoù ha testennoù.

• Danvez dre glewed ha dre weled dibar a gaver e dielloù ar glad dre gomz bet dastumet pell zo a-hed ar bloavezhioù, hag a zo kinniget gant ar gevredigezh Dastum : kanaouennoù, sonerezh, kontadennoù, mojennoù, resitoù ha testenioù ;
• Ar renabloù glad ha tier : berrdielloù zo bet savet gant Servij renabloù ar C’huzul Rannvro war glad an tier hag an arrebeuri dibar zo e Breizh ;
• Dielloù ar c’hazetennoù : an holl bennadoù-skrid bet embannet etre 1886 ha 1944 zo kinniget gant Dépêche de Brest, anv kentañ an Télégramme ;
• Dielloù kleweled : tamm-ha-tamm e vez bodet skeudennoù deus buhez an dud er vro gant Gwarez filmoù Breizh hag an INA Atlantel ivez ;
• Skeudennoù, kartennoù, dornskridoù ha levrioù ral : un 70 000 kartenn-bost deus gwechall er vro zo kinniget, da skouer, gant Cartolis, diaz roadoù Kreizenn kartennoù Baod ;
• Hag ivez kannadigoù ar c’helc’hiadoù gouiziegien, levrioù a denn d’an enklaskoù er skolioù-meur (Roazhon 2), dastumadegoù ar mirdioù, « Tabletennoù Roazhon » levraoueg niverel Rennes Métropole, teuliadoù KDSK ha Kreizenn an Enklaskoù Breizhek ha Keltiek (CRBC).

Ul lusker enklaskoù efedus-bras war veur a ziaz titouroù

Roiñ tro d’an holl dud da gaout anaoudegezh war an tammoù-se deus hêrezh Breizh, evit kompren anezhi gwelloc’h, evit roiñ da c’hoût da dud all, evit krouiñ diwarni, sell aze pal pennañ mediaoueg an xxi^vet kantved-se.

Trawalc’h e vo d’an implijerien klikañ amañ hag ahont, kinnig un nebeud gerioù alc’hwez d’al lusker enklaskoù, ha kaset e vint war-eeun d’an danvez a zo strewet war ar web, hirie c’hoazh, e-barzh diazoù roadoù ar berzhidi.

Emsavoc’h e vo ar genlabourerien, o deus bet miret bev hêrezh Breizh a-hed o bloavezhioù dastum ha niverelaat, pa vo lakaet war-wel da vat o dielloù war ar Porched ha kaset ar wiaderien da furchal pelloc’h o lec’hiennoù, a zalc’ho da vezañ meret gante.

A-bouez eo an danvez ouzhpenn a zo degaset gant Bretania (teuliadoù dre demoù, rizennoù, kartennoù, videoioù) d’an dielloù en o doare kentañ : aezetoc’h a se d’an dud kompren an dielloù-se. Ul lodenn vras deus labour BCD eo.

Ur vediaoueg vev ha cheñch-dicheñch, bouetaet ingal

Ne chomo ket an traoù a-sav e-giz m’emaint war Bretania en dazont : ur Porched bev eo da vat, ha bouetaet e vo ingal gant danvez nevez, kaset ivez gant perzhidi nevez, a grogo tamm-ha-tamm da labourat e-kreiz ur rouedad.

Mont da gaout perc’hennien war an diazoù roadoù, ha kinnig dezhe kenlabourat a-benn talvoudekaat o dielloù war ar Porched, sell aze unan deus kefridioù all skipailh Bretagne Culture Diversité/Sevenadurioù.

War ar memes tro e vez ar skipailh o labourat evit ma vefe diskouezet danvez ar Porched war lec’hiennoù all, gall (Gallica) pe deus broioù all (Europeana) hag evit ma c’hallfe danvez Breizh mont ha dont digabestr war ar web hag er bed.

Digoret e vo dorioù Porched sevenadurioù Breizh d’ar 14 a viz c’hwevrer o tont.

Ouzhpenn 350 000 teul a vo tu studiañ war eeun.

Digoret e vo dorioù Porched sevenadurioù Breizh d’ar 14 a viz c’hwevrer o tont. Ouzhpenn 350 000 teul a vo tu studiañ war eeun.