Gober Chouchen

Kerzu 2020

Dihunamb ! : dastumaden poblus deuviziek groeit aveit Breihis er Morbihan / renér Andréù Mellag ; pen-skriùagnour Loeiz Herrieu - 1913 - Gallica [ark:/12148/bpt6k6394968b]

 

 

"Eit er beizanted

Er chouchen

Er chouchen pe deur-vél e zo en ivaj-sé e vé groeit get mél ha deur. Guéharal é vezé groeit ur ioh ag en ivaj-men ar er mézeu, meit a houdé men dé ken stank er chistr hag en ivajeu tavarn émesk en dud  a ziar er mézeu, é ma bet dilézet er chouchen get er lod muian. Nen dé ket neoah en ivajeu e brenér, d'er liésan, én tavarnieu, seih pé eih real, e tal er chouchen groeit mat.

Lleih a dudu eùé ne houiant ket mui penaus é vé groeit en ivaj-men. Chetu penaus e téliet um gemér aveit gohér un ivaj huek hag e hel um hoarn pèl amzér.

Keméret ur fust e ia abarh ardro 100 bouteillad ha taulet abarh 25 bouteillad mél, de laret é ardro 75 livr. Taulet nezé ar er mél-sé deur kaer, deur fetan, ardro 74 bouteillad, aveit ma ne vo ket lan tré er fust.

Lakeit nezé ér fust 50 gram asid tartrik ha 10 gram sous-nitrat Bismuth. Hui gavo en treu-sé é ti a apotikér. Kemeret eué ardro 50 gram ag er bled-sé e cher er gurén ar er boketeu hag e lakant é lod hag en touleu a ou zirad ha téet ean mat én ur bannig deur. P'en dé distrampet a fèson, taulet ean er fust eùé. Nezé get ur vah mist, méret mat rah en treu ér fust, ha lakeitgoudé, ar en toul bond, un tam lién glup e lakeet arnehon un dornad sabl glup eùé.

A p'en des er chouchen achiùet hé bèru ketan, de laret é a pe ne gleuér mui en ivaj é hobér floup, é hellér lemel er sabl ha lakat er bond bras én é léh.

Er berù bihan e vé hiroh aveit hani er chistr. ret e vé ataù gortoz pemp pé huéh miz érauk ma vé prest er chouchen de vout tennet é bouteilleu.

Ret é dihoal a lezel guinègr én tachad léh ma vé chouchen é verù pé er chouchen e hellehé troien de huinègr.

Mar a huéh, aveit ma vo skléroh er chouchen, é hellér téein én ur banig guin-ardant mat 10 gram tanin e daulér nezé ér fust. (Mérat mat en ivaj get ur vah, épad ma vér é lakat é bouteilleu. Ne faut ket lakat er vouteilleu ar ou hosté, en taul ketan, rak ind e hellehé torrein. Er ré e gar chouchen hag e saill èl champagne e hel en lakat abretoh é bouteilleu guin champagne.

A pe gavér nen dè ket er chouchen liù erhoalh é hellér, a pe vér doh er gobér, lakat ur huérennadig vihan sirop karamel ér chouchen. 

Er chouchen groeit mat e  zo iahus, meit ne faut ket ivet anehon èl pe vehé chistr e vehé, rak kriù é ha mèuein e hra goah aveit chistr ha guin."

 

Guérénour

Kinniget gant : Bretagne Culture Diversité